Live from Cairoston

كان في واحدة ست، اسمها الحاجة هوية… وكان عندها تلات بنات… بهية وسنية وزكية.
الحاجة هوية كانت ست ستات القرية والكل بيحترمها ويقدرها…
كلمتها كانت تمشي على الكل… ووقفتها بوقفة ألف راجل ومية…
الكل كان بيحبها… إلا المعلم علمنة… لإنه كان طماع
المعلم علمنة كان عايز يعمل مشروع كبير في القرية… وكان بيحاول يقنع أهلها…
كان بيغريهم بالأحلام الوردية، وكان بيوعدهم إن المشروع ده حيفتحلهم أبواب السعادة الأبدية…
بس الحاجة هوية كانت عارفة إنه طماع، وإن مشروعه ده مش حيكسب منه غيره هو وبس…
فضربته على دماغه وقالت له اخرس يا ملعون… مافيش مشروع طول ما أنا عايشة وقوية!
فوقفت الحاجة وقفتها… والناس وقفت وراها…
فالمعلم علمنة المكار… فكر في خطة علشان يتخلص من الحاجة هوية…
لبس المعلم الحتة الزفرة وراح لسنية وزكية ووسوس في ودانهم اللي زي المهلبية
“البت بهية دي غبية زي الرزية… بتحاول تغري الواد عيسوي خطيب سنية!”
“يا لهوي! احنا كنا حاسين بكده من الأول!”… وراحت سنية وزكية ورموا بهية في ترعة المنصورية
هاهاها… ضحك المعلم علمنة… وآه آه آه… بكيت الحاجة هوية…
وفي اليوم التاني راح لسنية… “الحقي يا سنية! خطيبك عيسوي اتشتم… عارفة مين شتمه؟ اختك زكية!”
قامت سنية من قدام العجين… وشدت زكية من شعرها ورمتها في الفرن وسط النار الملهلبة
هاهاها… ضحك المعلم علمنة… وآه آه آه… بكيت الحاجة هوية…
وفي اليوم التالت… رجع تاني لسنية “الحقي يا سنية… خطيبك عيسوي سافر!! عارفة سافر ليه؟؟ عرف إنك قتلتي بهية وزكية… فقال لا يمكن اتجوز دي ولية!”
انهارت سنية… ومسكت السكينة اللي كانت بتقطع بيه الخضار وقطعت الشرايين المستخبية.
هاهاها… ضحك المعلم علمنة… وآه آه آه… بكيت الحاجة هوية…
وقف المعلم قدام أهل القرية يقنعهم بالمشروع الكبير…
فضل يغريهم بالأحلام الوردية، ويوعدهم إن المشروع ده حيفتحلهم أبواب السعادة الأبدية…
والحاجة هوية لابسة اسود في اسود في اسود وساكتة… والموت مستنية.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: